सिन्धूअ जो सडु_

*सिन्धूअ जो सडु_*
*************

लद्दाख जी वादियुनि में
बर्फीली   हवाउनि    में
सिन्धू सिक सां सडि_ड़ा करे थी
अचो मुहिंजी बां_हुनि में

ब_चिड़नि  खां कीअं दूर रहां थी
झंगलनि घाटनि में ई रुलां थी
पहिंजनि प्यारनि लालनि लइ
थञु भरी थमि छातियुनि में
अचो मुहिंजी बां_हुनि में. . .

अग_वाननि जी साज़िश सियासी
सिन्धी  बणिजी   पिया  बनवासी
घरिड़ा   छडे_   श्रीराम   ज्यां  
भिटिकनि  वेठा   बन  बन  में
अचो मुहिंजी बां_हुनि में ......

लुछंदी  वहंदी  सिन्धु  अचां  थी
पहिंजनि काणि पुछाणा कयां थी
अखा बहिराणा जोति झूलण जी
कीन  डि_सां  थी  किनारनि  में
अचो  मुहिंजी  बां_हुनि में......

शायद   मोटी   ईंदा   सुभाणे
आस इहा थी उमिरि बि छाणे
पहिंजूं  प्यारियूं  प्रेम  कथाऊं
पढ़िबियूं रुगो_ छा किताबनि में
अचो मुहिंजी बां_हुनि में.....

सागर सां मां जड_हिं मिलां थी
ताना सुहिमा  केडा_  सहां  थी
तो में छुहाउ न ब_चिड़नि  जो
सुरहाणि न  आहे  अंगनि  में
अचो  मुहिंजी  बां_हुनि  में.....

राह  सदाईं  डि_संदी  रहंदसि
आस में हरदम वहंदी रहंदसि
नेठि त  झूलणु  कंदो  सणाई
ईंदो  असरु  पक  आहुनि  में
अचो मुहिंजी बां_हुनि में........

*केटी दादलाणी-भोपाल*