सिन्धी ग़ज़ल जो जन्मदाता - सदाहयात नारायण 'श्याम'

*नारायण श्याम नागवाणी* 

*सिन्धी ग़ज़ल जो जन्मदाता - नारायण श्याम*
                                                                     

*"हुजे जा खाण ख़ूबियुनि जी, ऐं ऐबनि खां बिन्ह आजी*
*न पहिंजी ज़िंदगी अहिड़ी,  न  पहिंजी  शाइरी  अहिड़ी"*

       पहिंजी शाइरी ऐं ख़ुद बाबत अहिड़ो निउड़त वारो नज़रियो रखण वारे *सिन्धी ग़ज़ल जे पितामह नारायण श्याम जो जन्मु २३ जुलाई १९२२ ते सिन्ध जे खाही क़ासिम गो_ठ में थियो हो।* 
     विरहांङे खां पोइ  देहलीअ में पोस्ट आफिस में आडिट डिपार्टमेंट में क्लर्क जे पद सां पहिंजी नोकरी शुरु कयाईं ऐं पोइ उन ई खाते में हेड क्लर्क जे पद तां रिटायर थियो ।
            १० सालन जी उमिर खां ई शाइरीअ में दिलचस्पी हुअण करे हुनमें शाइरीअ जो शऊर ऐं समझ बि वडी_ लगन सां उभिरी।
      शाइरीअ जो शौंक़ु करे इंटरमीडिएट जे इम्तिहान वक्त़ हिक डीं_हु पेपर ई कोन ड_ई सघियो ।
     कविता जे इन शौंक़ करे ई हू पहिंजी शाइरीअ में नवां-नवां प्रयोग करे सघियो ऐं उनखे नवां आयाम बख्शाईं।
            नारायण श्याम हिकु गम्भीर, जिग्यासु साहित्यकार ऐं महान रचनाकार हो । विरहांङे खां पोइ चाहे सिन्धु हुजे या हिन्दु, समकालीन (हम वक्त) सिन्धी शाइरन में संदस नालो सभ खां मथे हो ।
            नारायण श्याम *क़ुदिरत जो सचो पूजा_री* हो। हुन पहिंजी शैली ऐं  कल्पना शक्तिअ ज़रीए इंसानी सुभाअ ऐं क़ुदिरत जी हर हिक रचियल शइ ते पहिजो क़लमु हलायो ऐं उनखे हिकु नओं रंगु, नई माना ऐं नओं इज़िहार बख्‍िशयो ।
      इन विषय में *शाह अब्दुल लतीफ भिटाई* खां पोइ सिन्धी शाइरीअ में नारायण श्याम जो मटु ‍बि_यो को कोन्हे। संदसि दिमाग़ में हलंदड़ वीचारनि में हर वक्त को न को प्रयोग जन्मु वठंदो रहंदो हो ऐं इहोई संदसि कविताउनि में नज़र ईदड़ दूरांदेशी सबबु आहे ।
            नारायण श्याम खां अगु_ फारसी ऐं उर्दू जे असर सबब सिन्धी शाइरी हुस्नो-इश्क, मयकदे, शराब-शबाब ऐं ‍फ़िलासाफीअ ताईं सीमित हुई, पर हुन इनखे नवां अणछुहियल मोज़ूअ, नवां प्रितीक, नयूं तश्बीहूं ऐं नओं इज़हार ॾई सिन्धी शाइरीअ खे मालामाल कयो। ‍फिलासाफी सां गडु_ हुन पहिंजी शाइरीअ में संदसि पारां भो‍गि_यल  डु_ख ऐं सूर, बि_यन जे गो_ढ़नि भरियल हयातियुन, लिकल हसिरतुन जो बख़ूबी अनोखो असरु छडीं_दड़ चिटु चिटियो आहे।         चवे थो :-

*"लुड़क अखिड़ियुन मां गड़ी ‍ॻल ते किरनि, उनखां  अगे_*
*मुस्कुराहट खे लबनि ते जे नचाईं, त मञाइं*

*श्याम ! खु़द मौतु बु_धी, मस्तु थी झूमे ऐं नचे*
*‍ज़िंदगीअ   जी   सा    मधुर   रा‍गि‍णी गा_ईं  त मञाइं।"*

हू काफी आशावादी कवि हो :

*"कहिड़ी दुनिया मुठीअ जी गा_ल्हि करियूं?*
*लुड़िक उघु खिल ख़ुशीअ जी गा_ल्हि करियूं*

*गुल   कोमाणा  खणी  त  पोइ  छा  थियो*
*वेहु   टिड़ंदड़  कलीअ  जी  गा_ल्हि  करियूं*

*मौत  ते  रोइबो   बि,   पर  हाणे*
*मुरिकंदड़   कलीअ   जी   गाल्हि   करियूं।"*               

            नारायण श्याम कविता, गीत, ग़ज़ल, तराईल, हाइकू, रुबाई, दोहा, सोरठा वग़ैरह शाइरीअ जी हर सन्फ ते क़लम आज़माई। संदसि कविताउनि जे मजमूए *"वारीअ भरियो पलांदु"* ते केन्द्र सरकार साहित्य अकादमी सम्मान ड_ई करे संदसि सम्मानित कयो।
            श्याम खे हूंअं त मुल्क जे सभिनी पवित्र नदियुनि लाइ आदरु,  श्रद्धा ऐं प्यारु हो पर *"सिन्धु" खे हुन माउ जो स्थानु डीं_दे चवे थो* :-           

*"गंगा  जमुना अमृत-अमृत,*
*लेकिन  थञु त सिन्धु आहे"*         

            सिंधियुनि जे वहिंवार में पहिंजी माउ जी बो_लीअ लाइ तिरस्कार जे रुखु डि_संदे खेस सिन्धी भाषा ख़त्म थियण जो अंदेशो हो, जेको हुन हिन तरह ज़ाहिर कयो :-          

*"अला! इएं न थिए जो किताबन में पढ़िजे,*
*त,  हुई सिन्धु  ऐं  सिन्ध वारन जी बोली ।*"

या

*"चवन था-  "श्याम ! तुंहिंजो  क़दुर  अॻते  हली थींदो",*
*त सचु  सिंधीअ जे लइ ज़िंदह रहण जी  हीअ दुआ आहे।"*

अहिड़ो डपु हुअण खां पोइ बि हू आशावादी हो, चवे थो :-

*"सिन्धु खे कोन  छडा_ए को  सघे  सिंधियुनि  खां,*
*सिन्धु सिंधियुनि में वसे, सिन्धु हुते, सिन्धु ‍हिते ।"*

छो त: 
 *'मुल्कु बणे थो मिट्टीअ सां न, मगर माण्हुनि सां।"*  

सिंधु लाइ संदस ओसीड़ो हिनन ॿन सिटुन में झलके थो :

*"रोई - रोई  हाइ, मूं  जा  चांडोकी छडी_,*
*तूं ई चंड  बु_धाइ,  अजु_ भी आहे सिन्धु में ?"*

            *जापानी कविता "हाइकू" खे सिन्धीअ में "तस्वीरूं"* जे नाले सां आणे हुन उनखे हिक नई औज बख्शी ।   कुझु मिसाल ‍डिसो:-

*"सूरन  में  हिक  नारि*                           *"भेॼ भिनीअ जे वेल*
 *साम्हूं अंब जे वण मंझां                           सन्हिड़ो-सन्हिड़ो चन्द्रमा*
*कोइल जी गूंजार ।"                                माक भिनल राबेल ।"*

*"तारन    संदी    बारात                           "कीअं  छिनां   ही   फूलु*
*सींधियूं ख्वाह सुहागिण्यूं                           टिड़ियलु इएं ई शाख ते*
*माणिन सागी_ रात।"                                साईं,  पवे   क़बूलु ।"*

*"सेन्वर चढ़ियलु तलाउ                           "छो   थी   छोड़ीं   छेरि ?*
*डे_ड_र  टपो डि_नो मगर                            सुहिणीअ  वारी चालि  ते*
*लहिरियुन जो न लखाउ ।"*
 *पहिंजा पेर  न हेरि ।"*

       समूरे मुल्क जे सिन्धी ऐं कच्छी भाषाउनि जे विद्वान अदीब पारां सदीअ जी अहिड़ी आला शख्स़ियत ऐं संदसि समूरे रचनाकर्म जी छंड-छाण संदसि ई मौजूदगीअ में करण लाइ केंद्रीय साहित्य अकादमीअ पारां ११ ऐं १२ जनवरी १९८९ ते आदीपुर में हिकु सेमीनार कोठायो वियो हो ।  उन  वक्त शायदि इहो पहिर्यों  मोक़ो हुजे हा, जॾहिं कहिं सिन्धी साहित्यकार जी संदसि मौजूदगीअ में उनजे रचनाकर्म ते को सेमीनार थी रहियो हुजे हा ।
       *पर क़ुदिरत खे शायदि इहो मंज़ूर कोन हो ।  सिन्धी साहित्य जी दुनिया में १० जनवरी १९८९ जो डींहुं सदियुनि ताईं कारे डीं_हं जे रूप में यादि कयो वेंदो रहंदो छो जो उन डीं_हुं सिन्धी साहित्य जो सिजु हमेशा-हमेशा लइ बु_डी_ वियो । सिन्धी भाषा जे वीरान चमन में हाणे श्याम जी बांसुरीअ जो मधुर आवाज़ु गूंजिजणु बंदि थी वियो*, बस खेस पसण लाइ वाइड़नि वांगुर लीया पाए रहिया आहियूं । हू पाण चई वियो हो :-

*"आंउं  त  हिकु आवाज़ु,  फ़िज़ा  में  गुमु थी वेंदोसाइं,*
*मूंखे डि_सण लाइ, पोइ गगन में वाझ वडा_ विझिजाइं।"*

इहो बि चयो हुआई त :-

*"वक्‍तु़  ईदो   जो   मिलण   खां   ई  परे  हूंदुस   मां,*
*मुहिंजो  भुलिजी   बि  कॾहिं   कोन  तो  वीचारु  कयो,*

*मुहिंजे   गीतन   जा   पन्ना  ई  पिया    हूंदइ   भरिसां*
*वक्‍तु़  ईदो   जो   मिलण   खां   ई  परे  हूंदुस   मां ।"*

श्याम पहिंजनि ग़ज़लनि, कविताउनि, बैतनि, गीतनि, दोहनि, सोरठनि, तस्वीरुनि, रुबायुनि सां सिन्धी साहित्य खे खू़ब मालामालु कयो पर शायदि अञा बि कुझु बहतरीन डि_यण जी संदसि तमन्ना बाक़ी हुई, तॾहिं त चवे थो:-

*"के गीत एकान्त में मूं गा_या आहिन,_*
*के गीत मूं दुनिया खे बु_धाया आहिनि*,

*मेठाजु हयातीअ जो मगर तिनमें आ,*
*जे गीत चपनि ते ई न आया आहिनि।"*

                             
    भॻवान बाबाणी
bhagwanbabani@gmail.com
मोब- 09893397340

*(हीअ दादा नाराइणु श्याम जी जीवनी भॻवान बाबाणी साहिबनि लिखी आहे)*