राजा ॿली करि भली

*राजा ॿली करि भली*

*ॾियारी ऐं राखीअ जे ॾिण जी कथा*

वामन पुराण में हिक कथा आहे त सतिजुॻ में ट्रिन्हीं लोकनि में राजा ॿलीअ जो राॼु हो । विष्णूअं छलु करे वामन (माना (बिन्दिरो - डेंडो) ॿाम्भण जो रूपु धारणु करे; राजा ॿलीअ वटि बिखिया वठण लाइ आयो हो । छो त उन्हं जुॻ में ऋषि, मुनि ऐं ॿाम्भण पंहिंजी कुटिया (आश्रम) में धनु वठण बिना सभिनी खे सिखिया - विदिया जो दानु ॾींदा हुआ । सिखिया जो दानु ॾियण लाइ ऐं पंहिंजे घर परीवार जी पालिना लाइ हू राजाउनि ऐं वॾनि धनवाननि खां दानु वठी ईंदा हुआ । 

राजा ॿली वॾो ॿलवानु; ॿुधीवानु ऐं दानवीरु राजा हो । हुन पंहिंजे ॿल ऐं ॿुधीअ सां पृथ्वी; पातालु ऐं देवताउनि जो सुरॻु (आकाशु) ट्रई लोक जीते वरिता हा । राजा ॿली वीरोचन जो पुट्रु ऐं भॻत पहिलाज जो पोट्रो हो । भॻत पहिलाज जी राॼधानी मुल्तान में हुई; जंहिंखे पहलाजपुरी चवंदा हुआ; जेका उन्हं जुॻ में सिन्धु जो भाङो हुई ।राजा ॿलीअ खे संदसि गुरू शुक्राचार्य ॿुधाए छॾियो हो त ईहो बिन्दिरो वामनु विष्णू आहे; जेको देवताउनि जे चवण ते छल सां तुंहिंजा ट्रई लोक हथि करिण लाइ आयो आहे । राजा ॿली पंहिंजे दर तां कंहिंखे बि बिखिया दानु ॾियण बिना न मोटाईंदो हो, ॿियो त विष्णूअं जी जाल लछिमीअं बि राजा ॿलीअ खे राखी ॿधी वचनु वरितो हो त हू संदसि पतीअ खे बिखिया ॾियण बिना न मोटाईंदो । इन्हंकरे राजा ॿलीअ विष्णूअं खे पंहिंजा ट्रई लोक बिखिया में दानु करे छॾिया । तॾहिं खां 'रखिड़ी ॿधण' जो ॾिणु मल्हायो वेंदो आहे ।

इन्हं ॾिण ते भेण, भाउ खे राखी ॿधण महिल राजा ॿलीअ खे यादि कन्दे चवंदी आहे - "राजा ॿली करि भली ." भेण, भाउ खे सदा सुखियो - सताबो रहण जी आसीस ॾींदी आहे ऐं भाउ, भेण खे वेस - वॻा ऐं दान में धनु ॾींदो आहे ऐं सदा उन्हंजी रखिया करिण जो वचनु ॾींदो आहे ।

पुराणनि जी कथा आहे त लछिमी समुद्र - मन्थन मां प्राप्त थी हुई । ईहो समुद्र - मन्थनु सिन्धू सागर में थियो हुओ, इन्हंकरे नालंदा विश्वविद्यालय जे नालंदा अद्यतन कोश में लछिमीअं जा ट्रे नाला 'सिन्धुजा', 'सिन्धू सुता' ऐं 'सिन्धी कन्या' आहिनि ।

असांजो सिन्धी समाजु राजा ॿलीअ जे इन्हं महादान खे ॾियारीअ जे ॾिण जे रुप में मल्हाईंदो अचे थो । 'पूतिणे' में "राजा ॿली करि भली" लिखी करे लछिमी-पूॼा कन्दा आहियूं । देश - दुनियां में व्यापार जे द्वारा लछिमी प्राप्त करिण वारो सिन्धी समाजु ॾियारीअ जे ॾींहुं लछिमीअं सां गॾु हट - दुकान जे रूप में "हटिड़ी-पूॼा" बि कन्दो आहे ।
प्रेमु तनवाणी