सिंधीअ जा उस्ताद शाइर सदाहयात खियलदास बेगवाणी(फ़ानी साहब) - नंद कुमार सनमुखाणी

सिंधीअ जे उस्ताद शाइर

सदा हयात खियलदास बेगवाणी(फ़ानी साहब) जी यादि में

(जनम ॾींहं 4 अप्रेल जे मोक़े ते)

  सिंधी शाइरीअ जे अरुज़ी आसमान ते फ़ानीअ जो नालो उन सितारे मिसल् आहे जेको सुबुहु थियणु जी, रोशनीअ जी आमद जो इत्तलाउ ॾींदो आहे। खियलदास बेगवाणीअ जो जनमु 4 अप्रेल,1914 ई. ते सिंध जे शिकारपुर शहर जे भरिसां मियां जो ॻोठ नाले हिक नंढिड़े ॻोठ में थियो। 

     संदसि पढ़ाई लिखाई शिकारपुर जे स्कूलनि में थी ऐं उते जे हिक उस्ताद शाइर जनाब आग़ा सूफ़ी दराज़ीअ पारां तिनि ॾींहनि तरह मिसिरे ते कोठाइजण वारनि मुशाइरनि में हुन जी शइरु-ओ- शाइरीअ जो शौक़ परवान चढ़ियो।    

   सिंधी शाइरीअ ॾांहुं संदसि रुझान ॾिसी सूफ़ी दराज़ी साहिब ॿालक खीअल खे हिमथाइणु शुरू कयो ऐं खेसि शाइरीअ रस्ते पंहिंजनि ख़्यालनि जे गुलिड़नि जी ख़ुश्बूइ आछण जो मौक़ो ॾिनो।  ख़ुद फ़ानी साहिब जे लफ़्ज़नि में ' मैट्रिक ताईं ईंदे ईंदे मुंहिंजनि अॻियनि उस्तादनि मुंहिंजे ज़हन में शइर जे लाइ तार ॼणु विहारे छॾी हुई.वरी जो कवि किशिनचंद जो 'शीरीन शइरु' पढ़ण जो मौक़ो मिल्यो, तंहिं मुंहिंजे दिलि में रंग ऐं उमंग जा जज़्बा पिण पैदा करे छॾिया।

         मूं पंहिंजो साहितिक सफ़रु अंदर जे आवाज़ु खे तबले जी तारि सां मिलाईंदे शुरू कयो। आलमु जा इंसान जंहिंखे अलन-सलीमु या 'इन बार्न या जन्मजात' सॾीनि था, उहे थी सघे थो मूंखे मौरूसी मिली व्या हुजनि जहिंकरे वज़न ऐं क़ाफ़िये जी पाबंदीअ ख़ुद ब ख़ुद मुंहिंजी राह में रुकावट पैदा कान कई। कुझु सुर या गले सबब मां ख़ुद शाइरु बणिजी पियुसि। इनकरे ई त मूं पंहिंजी नज़्मनवीसीअ लाइ हिक हंधि लिखियो आहे - 

’’मुंहिजो छाहे जंहिंखे मां पंहिंजो चवां

मुंहिंजी कविता ते करमु कंहिंजो चवां"

     पंहिंजी हयातीअ जो अहवालु ॾींदे हिक जॻह ते फ़ानीअ लिख्यो आहे त 

' मूं शिकारपुर में ई जवानीअ जा 13 साल, हाई स्कूल ऐं कालेज में शागिर्दनि खे तालीम ॾींदे गुज़ारिया।, उन्हीअ अर्से में मां ख़ुशनसीबां शेख़ अयाज़, सतराम हमदर्द, हूंदराज दास ऐं सुॻन आहूजा जूं कचड़ियूं कोशिशूं नज़र मां कढंदो रहंदो होसि। 

       उन्हनि जे ज़रिये ई अक़ीदतुनि ऐं उपटार मां उस्ताद शाइरु सॾियो व्यो आहियां । पर मां पंहिंजो पाण खे मुस्तहक़ न मञींदो आहियां, छाकाणि त हर हिक शाइर जो तख़य्युल ऐं तख़्लीक़ जी तौफ़ीक़ ई संदसि सही रहबरु थी रहंदा आहिनि।  संदसि अंदिरियां उमंग, अनुभऊ ऐं शब्द भंडार ई उन्हीअ हासिलात में इज़ाफ़ो आणींदा रहंदा आहिनि.'

(ख़िज़ां जी ख़ुश्बूइ पीला पन, सु 10ـ9)

फ़ानीअ जिनि सलाहियतुनि वारनि शागिर्दनि जी चीच पकिड़े, पंधु सेखारे, पंहिंजी सघारी सोचुनि वारी पुल तां पार पुॼाइण जो औखो अमिली कमु कयो, उन्हनि मां केतिरा अॻिते हली पंहिंजी सुञाणप पाण बणिया ऐं संदसि अहिड़नि शागिर्दनि मां शेख़ अयाज़ ऐं सुॻन आहूजा जहिड़नि सघारन दस्तख़तनि बाबत त चई सघिजे थो त हू ख़ुद बि सिंधी साहित जी सघारी पुल साबितु थिया।

         जीअं मथे ज़िक्र कयलु आहे त शिकारपुर जे आसपास जे शाइरनि जी ख़ुशिकिस्मतीअ सां उतां जो उस्ताद शाइरु जनाब आग़ा सूफ़ी दराज़ी तरह मिसिरा ॾेई , उन जे क़ाफ़िये ऐं रदीफ़ जे आधार ते मुशाइरा मुनइक़िद कंदो हुओ। फ़ानी साहिब उन्हनि ॾींहनि खे यादि कन्दे लिखे थो त शाल मालिकु, मरहूमु जनाब आग़ा सूफ़ी दराज़ीअ खे अब्दी जाविदानी बख़्शे जेको उते अक्सर तरह मिसरा ते ॿधल मुशाइरा कराईंदो हुओ। अहिड़े ई हिक मुशाइरे में ॾिनल सिट हुई 

’’सुहणनि सां मिलूं छा असां बसि गोश गीर हूं."

ऐं तंहिं वक़्त जे नौजवान नींगर फ़ानीअ इन ते पंहिंजो शइरु जोड़ियो :-

’’ॿाफ़े  न ॿुधायूं असीं गहरा गंभीर हूं

रखंदा सदाईं दोस्त लइ दिल में उकीर हूं

दौलत खे हणी लत असां उलफ़त खे चुमियोसीं,

हा सूं अमीर, हाणे गदादर फ़क़ीर हूं

के साल, बुरे हाल मुहब्बत में थिया गुज़िश्त,

आहियूं कबीर राह इश्क में सग़ीरु हूं

  इहो शइरु ॿुधी आग़ा सूफ़ी दराज़ीअ उते वेठल माण्हुन जे विचमें चई ॾिनो ''ॾिसो यार, छोकिरे जी उमिरि 20 साल मस हूंदी पर चए थो के साल बुरे हाल मुहब्बत में थिया गुज़िश्त शाइरसाज़ीअ में इहो मुबालग़ो ई आहे जो शाइर खे कामियाबु शाइरु थो बणाए."

    फ़ानीअ बयानु कयो आहे त अहिड़े आला ऐं अणविसिरन्दड़ उन मुशाइरे जी सदारत कवि किशिनचंद बेवस करे रहियो हुओ। जॾहिं नौजवान शाइर फ़ानीअ ॾिनल हिक सिट ते पंहिंजो हीउ शइरु जोड़े ॿुधायो 

’’जोशु जारी जाबजा जोरो जफ़ा जो थी वियो

होसि माठीणो पियो बणिजी ज़बानी ज़ाग़ आह,

देवता जे दिल अंदर दौरो दग़ा जो थी वियो'

            तॾहिं बेवस साहिबु नौजवान फ़ानीअ खां मुतासर थियो ऐं उते ई खेसि बेवस जी आसीस ऐं इस्लाह अता थी ऐं आग़ा सूफ़ीअ पिण फरमायो ' हीउ फ़ानी असांजे शिकारपुर जो नढिड़ो बेवस अथव.'

फ़ानी जॾहिं शिकारपुर कालेज में प्रोफ़ेसरीअ जे पद लाइ उम्मीदवार बीठो तॾहिं बेवस साईंअ वटां खेसि हिकु नवाज़िशनामो मिलियो , जंहिंजो मज़मून कुझु हिन रीति हुओ :-

’’ मिस्तर खियलदास बेगवाणी (फ़ानी) ،

बी.ए, शिकारपुर सिंध कालेज में सिंधी प्रोफ़ेसरीअ लाइ उम्मीदवार बीठो आहे। प्रोफ़ेसरीअ जी लियाक़त लाइ कालेज जी डिग्रीअ सां गॾु जा खेसि नाज़ुक ख़्याल शाइरीअ जी ॾाति अता थियल आहे, सा मुंहिंजी नज़र में अहिड़ी आहे, जहिड़ी सोन मुंडीअ में हीरे जी कणी।

हइड़ी आला शख्सियत हथि अचे त सिंधी बो॒लीअ जो शान दोबाला थींदो।

18 मुई,1948

किशिनचंद तीर्थदास खत्री (बेवसि)

लाड़काणो

     फ़ानीअ वरी कवि बेवस शताब्दीअ जे मोक़े ते बेवस साईंअ लाइ पंहिंजी अक़ीदत जो इझो हींअं इज़हारु कयो आहे :-

’’हू न त्याॻी हो, न वेराॻी न साधू संत हो

सादगी,सेवा, सचाई, रहति में सतवन्त हो

दानदाता जे हथनि में ज्ञानजो गुर मंत हो

थी क़लमु तां पई फ़िदा कामिल कला, कुलवंतु हो

अहिड़ो बेवस बेमिसालु हो कवीसरु बा कमाल..

हुन अची खोले पढ़ियो पहिरियाईं क़ुदिरत जो क़िताबु

हिन कंवल मटि नाहि नरगिस, मोतीओ, गेंदो, गुलाबु

हू सिपून सोधण में सूंहों ऐं उॾामण में उक़ाबु

चिमकंदड़ सितारनि में थी मुश्कियो 

माहताब

अहिड़ो बेवस बेमिसालु हो कवीसरु बा कमाल

जंहिंजे वर्से खे संभालिन शाल क़ाबिल क़दुरदान

छा छुही सघंदो बुलंदी जंहिंजी ऊंचो आसमानु

सौ सदियूं ॻाईंदी रहंदी जंहिंजो जसु सिंधी ज़बान

व्यो छॾे फ़नकारु 'फ़ानी फ़न जे अज़मत जा निशान

अहिड़ो बेवस बेमिसालु हो कवीसरु बा कमाल

(ख़िज़ां जी ख़ुश्बूइ पीला पन, सु 4ـ3)

फ़ानीअ जी शाइरी :

       फ़ानीअ जो मुतालओ ऐं मुशाहिदो  वसीअ हो। संदसि शाइरी पढ़ण सां ख़बर पवे थी त ''फ़ारसी घोड़े चाड़हसी' वारे उन दौर में हुन शाइरीअ खे ठेठ सिंधी वेस वॻा पहराए निज सिंधी रुपु ॾिनो ऐं सिंधी शाइरीअ में अॻिमें ई इज़हारियल केतीरियुन ॻाल्हियुनि खे हिक नएं नज़रिये सां पढ़ंदड़नि जे साम्हूं पेश कयो :

’’ख़िज़ां जूं ख़िज़मतूं महसूस कंदो कीअं न बहार

पुराणा पन छणी पतझड़ जो थियनि न जे शिकार

नवां पन किथि ॼमनि जे पहिरीं  पुराणा  पन   न छणनि

चढ़े कींअं हा गुलनि फुलनि मथां ख़ुश्बूइ जो ख़ुमारु'

अक्सर हरिको बहार जी आजियां कंदो नज़र ईंदो जमालियत जे हवाले में ख़िज़ां जो ज़िकरु नफ़ी नज़रिए खा ई ॾिसण लाइ मिलंदो आहे.पर शाइरु फ़ानी मथिएं शइरु में ख़िज़ां जी ख़िज़मतुनि जी बि साराह कन्दे चवे थो त पुराणा पन छणणु ते ई नवनि गुलन फुलन खे उसिरण लाइ जॻहि मिले थी ऐं बहार अचे थो ख़िज़ां जी अहिड़ियुनि ख़िज़मतुनि खे भला बहार कींअं विसारे सघंदो

संदसि शाइरीअ जि कुझु ॿिया मिसाल ॾिसो 

’’तूं ख़िज़ां मुंहिंजीअ जी रुत बणिजी बसंत

मुंहिंजे आनंद जो कॾहिं ईंदो   अंत

मां फ़क़ति 'फ़ानी  न आहियां नासवंत

मां कंदो रहंदुस सदा संसारु तुंहिंजे जो सफ़रु..

(ख़िज़ां जी ख़ुश्बूइ पीला पन, सु 18 )

’’मिलणु दिलदार जो दीदार थियो दुश्वारु छा थीपियो

पवां मां पीसिजी महबूब जे अखियुनि में अंजनु थी'

’’लिकायमि पिप पंहिंजा पिण खां ऐं दाग़ दुनिया खां

उभा थी साम्हूं आया जॾहिं, दिलि पेई दर्पन थी'

’’रॻुनि जे तारि ते 'फ़ानी लिकी चउ राॻु उलफ़त जो

अंदर में साज़ु सूरनि जो बिना वाॼे वॼणु घुरिजे'

ॿियनि देश भॻत हिंदु वासीयुनि ज्यां फ़ानीअ बि आज़ादी हलचल में पंहिंजे क़लमु ज़रिए बहिरो वरितो

’’वतन वारनि खे आज़ादीअ तां सभकुझ घोरणो पवंदो

मरण जो मूंखे डपु नाहे छो जिंदह लाशु थी जीआं

घुटे नग़मा न बुलबुल खे चमन में घरिणो  पवंदो'

’’कयो क़ुदरत मुख़ालफ़ जे दिशाउनि खे, फ़िज़ाउनि खे

असांखे ज़िदु करे ओलहु मां सिजु ओभारिणो पवंदो'

हिन्दू मुस्लिम इत्तिहाद बाबति हुन जे क़लम लिखियो 

’’दूर थिये जेसीं न दिल मां फ़र्कु फ़तनि ऐं 

फ़सिद

कींअं सघूं दुश्मन सां जोटे जंगि या जबरो जिहादु'

विरहाङे खां पोइ वतन जी यादि ऐं उन खां विछुड़णु जो दर्दु फ़ानीअ जे शइरनि में बि नुमायां आहे 

’’ओ मुहिंजा वतन, दिलदार वतन

कया केॾा भुलाइण जा मूं जतन

लॻी लुंअं लुंअं में आहे अहिड़ी लगन

भुल खां न भुलनि उहे भाण भवन'

ऐं

’’मुश्किल थी प्यो वापसि आ वरणु

मुश्किल थी प्यो ॻणितियुनि में ॻरणु

चाहे थो हरणु वारीअ ॾे वरणु

समुझे थो सुठो उञ रुञ में मरणु

संसार जो तंग ख़ियालु छॾे

दिलि क़ुरब जो तुंहिंजे कमालु सॾे'

वरी हिते लॾे आयल आम सिंधीअ जे हालात जी अकासी हींअं थो करे 

’’समुझां थो मगर मोटणु आ मुहालु

मोटां बि अॻियों कींअं ईंदो जमालु

ज़ाहिर थो ॾिसां हिति पंहिंजो ज़वाल

भलि ख़ल्क सॾे इहो ख़ाम ख़्याल'

   सिंधु ऐं सिंधुवासियुनि जी ताति हुन खे राति ॾींहुं लॻी ई पेई हूंदी हुई। केतिरियुनि ॿोलियुनि जे अदब में कबूतर ऐं कांग जहिड़नि पखियुनि खे नींहं वारनि जा नियापा स्नेहा पहुचाइण वारनि क़ासदन जे रूप में चिटियो वेंदो रहियो आहे। सिंधी अदब ऐं लोक जीवन में कांगल जो हिन रूप में ज़िक्रु ॿियनि पखियुनि जी भेट में कुझु सर्सु ॾिसणु में अचे थो। फ़ानी बि पंहिंजे वतन ऐं वतन वासियुनि जी ख़बर चारि सुणाइण लाइ कांगल खे इसरार कंदे चवे थो त जिनि पियारन जी वाई पल पल मुंहिंजे वाति आहे, ओ कांगल, उन्हनि जो को अहवालु ॿुधाइ 

’’मुंहिंजे मारुनि जी , ओ कांगा, लंउं का लाति

पल पल प्रियुनि जु, वाउ अथमि वाति ड़े

मुंहिंजे मारुन जी , ओ कांगा, लंउं का लाति.....

होॾांहुं बादल था बरसन त हेॾांह शाइर जा नेण नींहं जा नेसारा था वहाइनि. हू विछोड़े जे दर्द खां एतिरो त व्याकुल आहे जो चवे थो त अखिड़ियुनि जे इन बरसात खे भला कींअं रोके सघिबो 

’’जींअं जींअं हुते मींहुं ककरनि वसायो,

तींअं तीअंन हिते नीरु नेणनि टिमायो,

रोके सघां कींअं , अखिड़ियुनि जे बरसात ड़े

मुंहिंजे मारुन जी , ओ कांगा, लंउं का लाति.....

कमनसीबीअ मूंखे जिनि खां विछोड़े विधो आहे, उन्हनि जी मुंहिंजे जीअ में ॼणु झोरी लॻी वेई आहे ऐं उन्हनि जे फट फिऱाक़ में नको मूंखे ॾींहं जो चैनु आहे ऐं न राति में क़रारु आहे.. ओ कांगल मूंखे उन्हनि वतन वासियुनि जो त को अहवालु ॾे :

’’जिनि खां जुदा कयो, क़िस्मत निदोरी,

तिनि जी लॻल आ जीअ में का झोरी,

ॾुखंदे कटे ॾींहुं, लुछंदे निभे राति ड़े

मुंहिंजे मारुनि जी , ओ कांगा, लंउं का लाति.....

ओ कांगा जंहिं बेवसीअ ऐं लाचारीअ जी हालति में अॼु मूंखे क़िस्मत आणे बिहारियो आहे, तंहिंजो उन्हनि खे बि को अहसासु, को दर्दु आहे ? जिन जी राति ॾींहं मूंखे ताति ऐं तंवार लॻी पेई आहे, छा उन्हनि जूं अखियूं बि मुंहिंजे हिन हाल ते भिनियूं  ऐं छा इन लाइ हुननि का दिलदारी ॾिनी..

’’मुंहिंजी बेवसी, मुंहिंजी लाचारी,

रोई ॾिनाऊं का, तंहिं लइ दिलदारी,

फ़ानी मिसलि मूं, तिनि खे बि हुई ताति ड़े

मुंहिंजे मारुनि जी , ओ कांगा, लंउं का लाति.....

विरहाङे खां अॻु वारे दौर में सिंधु में नज़्म लिखण जो शौक़ु वधंदड़ हो । फ़ानीअ बि काफ़ी तादाद में लंबियूं नज़मूं लिखियूं, जिनि मां कुझु जा उनवान आहिनि ’’मीरख़ान" ـ ''द्रोपती" ـ ''बअजवु बांवरो" ـ ''जीवति ऐं मौतु' ऐं ''वक़्त जो आवाज़ु'' संदसि अविइली दौर जो शइरु सिंधु जे कालेजी मख़ज़नुनि खां सवाइ मशहूर अदबी मख़्ज़िन ''सिंधू" में , ''अॻिते क़दमु' नाले वारे हिक माहयानी मख़्ज़िन ऐं हैदर बख़्शु जतोईअ जे ''हारी गीतु' जे मुख़तलीफ़ शुमारनि में छपियल आहे, जेको1950 ई में फ़ानीअ जे सिंधु छॾे हिंदुस्तान जे भोपाल शहर में अची रहण खां पोइ उते ई रहिजी व्यो जंहिंखे फ़ानी 'पंहिंजी जज़्बाती जाइदाद जो उते रहिजी वञण कोठे पंहिंजे शइरनि जे हिक कठ (कविता संग्रह) ''ख़िज़ां जी ख़ुश्बूइ पीला पन' जो पेश लफ़्ज़ु लिखन्दे अफसोस जो इज़हार कयो आहे जो उन समूरी शाइरीअ जी हिक बि कापी वटिसि न रही हुई।

हाणे इहो सिंधु में रहंदड़ अदब दोस्तनि ऐं मुहक़क़न जे हथ वसि आहे त हू सिंधु जे अलॻ अलॻ मैग्ज़ीनुनि में टिड़ियल पखिड़ियल फ़ानीअ जे अवाइली शइर खे गॾु करे किताबी सूरत में अदबी जॻत जे साम्हूं आणींनि जींअं संदसि अदबी जाखोड़ुनी जी मुकम्मल कथ थी सघे ऐं अदब दोस्तनि खे संदसि समूरो शइरु छापे जी सूरत में मुयस्सर थी सघे।

विरहाङे खां पोइ पैदा थियल हालतुनि में हिते सिंधी ॿोली, अदब ऐं सिंधियत जी शमा खे तूफ़ानी हवाउनि खां बचाइण लाइ बरजस्ता ऐं अमली क़दम खणणु ॼणु फ़ानीअ जे जीवनु जो मक़सदु बणिजी प्यो. इन लाइ हिक पासे हिन साहित्य अकादमीयुनि , जुदा जुदा अदबी इदारनि, अदबी मेड़िनि ऐं सेमीनारनि में शाह, सचल ऐं सामीअ जे कलामनि जी ओख डोख करण जूं सफल कोशिशूं करे पंहिंजी धरतीअ खां धार थियल सिंधयुनि जी पंहिंजी आला अदब सां वाक़्फ़ियत कराई त ॿिऐ पासे वोकल कल्चर जो सहारो वठी सिंधियुनि जे अहंजनि ऐं ईज़ाअन जी पीड़ा घटि करण लाइ संगीत जो सहारो वठी पंहिंजे ऐं साथी सिंधयुनि जे मन खे मशग़ूल रखण जी कोशिश कई ऐं आकाशवाणीअ ऐं टी.वी.अ तां गायक ऐं गीतकार जे रुप में सभिनी खे रसु वठाईंदो रहियो।

हुन भोपाल जे सिंधी कलाकारनि खे गॾु करे ''कलाकार मंडल" नाले हिक थिएटर ग्रुप जी शुरूआति कई, ऐं आख़िरी दम ताईं उन जो रूहुरवां थी रहियो. हुन न सिर्फ़ अलॻ अलॻ समाजी विषयनि ते नवां नवां नाटक लिखिया पर उन्हनि खे स्टेज ते आणण में बि अहमु किरदारु अदा कयो । तिनि ॾींहंनि में सिंधी नाटकनि लाइ फ़ीमेल सिंधी आर्टिस्ट ॻोल्हिया बि न लभंदा हुआ. माण्हू पंहिंजियुनी धीइरुनी भेनरुनी खे नाटक में आर्टिस्ट जे रूप में कमु करणु जी मोकल ॾियणु खां कीॿाईंदा हुआ, पर छाकाणि त फ़ानी साहिब उन वक़्त सरकारी हायर सेकंडरी स्कूल जे प्रिंसीपाल जी आला उहिदे ते कमु करे रहिया हुआ ऐं पंहिंजी रहीणी कहिणी ऐं रौबदार शख्सियत जे करे हुन खे माण्हुनि में अहतराम ऐं इज़त सां ॾिठो वेंदो हुओ, तंहिंकरे भोपाल जे सिंधी थिएटर मूवमेंट सां वक़्त वक़्त ते सुठा सिंधी फ़ीमेल आर्टिस्ट जुड़ंदा रहिया ऐं कलाकार मंडल जो कारवां हिक खां पोइ ॿियो सिंधी नाटकु कामियाबीअ सां मंच ते पेश करणु में कामयाबी हासिलु कंदो व्यो. जेकी मुख्य नाटक हिन ग्रुप तर्फ़ां भोपाल ऐं ॿियनि शहरनि में पेश थींदा रहिया उन्हनि मां कुझु जा नाला आहिनि - ’’क़िस्मत जो खेलु"، ''विरहासत" ، "शल धीअरु ॼमनि" ،''अहसास जो आईनो"، ''करिणी भरिणी" ऐं ''पछताअ जा ॻोढ़ा''. कलाकारु मंडल जे इन हलचल में फ़ानी साहिब खे नेभनदास जॻवाणी ऐं दादी गोपी दौलताणीअ जो जेको साथु ऐं सहिकारु मिलियो, तंहिंखां सवाइ कलाकारु मंडल जे हिन हलचल खे इहा कामयाबी शायदि ई कॾहिं नसीब थिए हाँ, जेका हिन ग्रुप हक़ीक़त में हासिलु कई । अटिकल पंजनि ॾहाकन जे हिन सफ़रु जे शुरूआती ॾींहनि में फ़ानी साहिब कुझु नाटकनि जु पाण हिदायतकारी कई, पर पोइ अशोक बूलाणीअ जे रूप में सिंधी हिन्दी थिएटर जे कलाकार ऐं हिदायतकार जे जुड़णु खां पोइ फ़ानी साहिब जे लिखियल बाक़ी सभिनी नाटकनि जी हिदायतकारी इन नएं जुड़ियल साथी अशोक बूलाणीअ ई संभाली। हुन जी हिदायतकारीअ में अॼु बि फ़ानी साहिब जा लिखियल नाटक हिंदुस्तान जे अलॻ अलॻ शहरनि में कामियाबीअ सा पेश थी रहिया आहिनि ऐं ख़ासी मक़बूलियत बि हासिल करे चुका आहिनि।

पेशकश:- नंद कुमार सनमुखाणी