सदाहयात गोवर्धन महबूबाणी "भारती" - प्रस्तुति: नंद कुमार सनमुखानी

 





              22 जून पुण्यतिथि 

सदाहयात गोवर्धन महबूबाणी "भारती" 

   

         












         


         नज़्म-सिंधू सागर

                  1

छम् छमा छम् छेरि जी झीणीअ मधुर झंकार सां

मर्म सां ऐं शर्म सां, कुछ दर्द सां कुछ ढार सां

गोदि मां कैलास जे सिंधू-सखी आई लही

सख़्तु जबलनि जे जिगर मां भी हलियो 

पाणी वही

हेठि बीठी मानसरोवर ,नेण आंसुनि सां भरे

सोज़ मां तंहिंसां मिली , सिंधू सखी भाकुरु भरे

-                      2

मोकिलाए माउ खां सिंधू हली दुल्हन 

बणी

उन समे प्रभाति आयो प्यार में सिंधुर खणी

हेज मां उति हीर आंदी , फूह फूलन जी झड़ी

साणु सूरजु भी भरे आयो जवाहरनि जी भरी

शौक़ सां लामुन मथां पंछियुनि वॼाया साज़ भी

किनि विछोड़े खां वरी दर्दी कया आवाज़ भी

-                       3

पेरु पाए पेर में सा नारि सागर ॾे हली

राह में संझा संदसि हथड़नि मथां मेंदी मली

रातड़ीअ भी चंड जी चिंदी लॻायसि चाह सां

हार तारनि जा वठी , सिंधू हली उत्साह सां

प्रेम जो रस्तो अणांगो,मुहिब जी मंज़िल परे

हूअ मगर हलंदी रही , बसि ध्यानु प्रीतम जो धरे

-                       4

मुहिब जे ई दरस जी,जिनि जे अखियुनि खे प्यास आ

आस प्रीतम जी रुॻो , जिनि जे दिलियुनि जी आस आ

दिलि नशे में नींहं जे, तिनि जी वञे थी तार थी

प्रेमु जे सैलाब मां आख़िर वञनि से पार थी

बसि इझो हीउ ॾिसु सखी, प्रीतमु न तोखां दूर आ

हाय तुंहिंजे प्रेमु में, हुन जो बि हिर्दो चूर आ

-                       5

हाँ अड़ी, ही छा चरी! छा लइ डुकीं थी जोश में

प्रेम में पाॻल न थी , कुछ शर्मु करि, अचु होश में

ड़ी संभाले हलु! मतां तुंहिंजो पवे घूंघटु लही

ऐं वञनि किनि बेगुनाहनि जे मथां नज़रूं वही

छॾ उछल ओ छेॻरी जोभनु मतां छलिकी उथे

छिकि पलअ खे, हुस्न पोशीदह मतां झलिकी उथे

-                       6

ध्यानु छाजो? सोचु छाजो? होशु छाजो  प्रीति में

शर्मु छाजो? मर्मु छाजो? पोशु छाजो प्रीति में

प्रेम में छल छल कंदी, कल कल कंदी सिंधू वेई

पाण खोहे सा पिरींअ जे प्रेम-चरणनि में पेई

सिक मंझां सागर उथारियो , कुंवार खे भाकुरु भरे

प्रेम जे तासीर सिंधूअ खे छॾयो सागर करे

श्री गोवर्धन भारतीअ खे बुनियादी तौर गीतनि जो शाइरु करे लेखियो वेंदो आहे, जो हुन हिन्दुस्तान में ठहण वारियुनि लॻभॻ सभिनी फ़िल्मुनि में गीत लिखिया जेके मक़बूल पिणि थिया। संदसि क़लमबंदि कयल केतिरा ई लाॾा भॻवंती नावाणी ऐं सतराम रोहड़ा जे आवाज़नि में रिकार्ड कयल आहिनि। हुन जो ग़ज़लु ...थोरो आहे पर पुरअसर आहे । खेसि 1990 ई. में, संदसि 1988 ई. में शाया थियल ग़ज़लुनि जे किताब शीशे जा घर लाइ हिंदुस्तान जी मर्कज़ी साहित्य अकादमीअ जो इनामु पिणि अता कयो वियो हुओ।

 अॼु संदसि जनमु ॾींहं जे मौक़े ते हुन खे यादि कन्दे, हुन जो समूरो रचना संसार अखियुनि आॾो फिरी रहियो अथमि। तव्हांखे पिणि भारती साहिब बाबति पंहिंजियूं यादगीरियूं ऐं तास्सुरात वंडण जी नींढ आहे

वीहनि वर्हियनि जी उमिरि में "मौत" बाबति संदसि वीचार हिन रीति शइर जी सूरत में आया -

ज़िंदगीअ जी शाम, नवजीवन संदी प्रभात तूं

मौत मिठिड़ा क़हर जी ऐं महर जी बरसात तूं

दाइमा नेणनि निमाणनि में नशीली रात तूं

सोज़ वारनि लइ सदाईं, सिक भरी सौग़ात तूं

तूं अजर ,आहीं अमर, तुंहिंजो नकी आग़ाज़ु आ

बे डपा बे अन्त ! तो में को लिकायलु राज़ु आ

सचपच भाऊ...मौत मथां, पहिरीं ई लिख्यल संदन हीअ नज़्म बि काबिले ग़ौर आहे....

 आखिरी मंज़िल तूं असांजी, आखिरी आराम तूं

दाइमा नेणनि निमाणनि में नशीली रात तूं

सोज़ वारनि लइ सदाईं सिक भरी सौग़ात तूं

*तूं अजर आहीं अमर तुंहिंजो नकी आग़ाज़ु आ

बे डपा ! बे अंत ! तो मे को लिकायलु राज़ु आ

दूर पश्चिम जी पछाड़ीअ में रहीं चुपचाप थो?

या उफ़क़ जे ओट मां तुंहिंजो अचे आलाप थो

छा ?उछल खाई उथीं थो कंहिं अजब ओड़ाह मां?

या वरी उॾिरी अचीं थो आसमान जी आह मां 

ओ अगम ! कहिड़ी पिरोली या ॻुझारत गूढ़ तूं

थो रहीं संसार में, संसार खां पर दूर तूं !

केरु आहीं? साज़ु कहिड़ो थो वॼाईंदो वञी

ख़ुश करे किनि खे, वरी किनि खे रुलाईंदो वञी

ओ हचारा ! थो किथे, हर चीज़ डाहींदो वञी

किनि अंदरि मुक्तीअ संदी ममता जॻाईंदो वञी,

को अजाइबु खेलु आहीं,या मनोहर ख्वाबु तूं

या वरी गजगोड़ वारो क़हर जो गरदाबु तूं?

ओ उजाला आत्मा जा !

ओ अजाइबु रौशनी !!

ओ मधुर मस्तीअ भरी रसु 

रोॼ वारी राॻिणी !!!*

ओ दॿियल आहट 

दॿियल भुणकार क़हरी काल जी !

ओ अजबु अखिॿूट, 

मुस्तक़बिल, गुज़िश्ता हाल जी !!

दर्द, दुख ऐं सोज़ वारनि 

जो सहारो थो बणीं

कष्ट में जीवन जी किश्तीअ लइ

किनारो थो बणीं

सूरमा ! तुंहिंजे अॻियां

बेवसि बणियो संसारु आ

शोख़ शाहूकारु भी 

मुफ्लिस, दुखी, लाचार आ

होॾ वारो हिश्मती हाकिम 

रड़े थो, तो अॻि्यां

सिरु झुकाए ख़ाक ते 

हरको धरे थो,तो अॻि्यां

तूं अटल आहीं अचल 

संसार में ॿलवानु तूं

थो भञी भोरे छॾीं 

हर चीज़ जो अभिमान तूं

क़ाफिलो तुंहिंजो छॾींदो 

थो वञे पेरा पुठियां

ड़े ! भॻल, भड़भांग चीज़ूं

ऐं ॾरियल ॾेरा पुठियां

हाय ड़े ! बेजान हस्तियूं 

ऐं उजड़ि बस्तियूं करे

*थो सुणाईं, हाय ! 

हरिका चीज़ आख़िर थी मरे

साहसी ! तो में समायलु 

ज्ञान जो भंडारु आ

"चार ॾींहड़ा चांदनी ऐं 

चार ॾींहं संसारु आ"

ओ हचारा ! आह ज़ारी 

सां रड़े संसारु थो

छा कॾहिं इन ॻाल्हि जो 

भुलिजी करीं वीचारु थो ?

विश्व जी कोमल कलियुनि जी

तूं निचोईं जान थो,

सख़्त दिल ! पापी !! न पर 

भुलिजी करीं अरमानु थो

हाय ! बे-ग़म, बे-अलम

बे-तरस, बेदर्दी बला !!

छा ? न थींदा ख़त्म 

तुंहिंजे ज़ुल्म जा ही ज़लज़ला?

मौत ! तो में मौज, मस्ती

जोशु, जीवन , प्यारु भी

महर तो में, क़हरु तो में

हाय ! हाहाकारु भी

राॻु ऐं वेराॻु तो में 

शानु भी, अभिमानु भी

ज़ुल्मु तो में, ज़ोरु तो में

तड़फंदड़ु तूफानु भी

थो सुणाईं काल जो 

संसार खे पैग़ामु तूं

आख़िरी मंज़िल असांजी

आख़िरी आरामु तूं..

चवनि था भारतीअ जो "शीशे जा घर" शहिरी जीवन जो दस्तावेज़ु आहे। उन मां कुझ शइर पेश आहिनि 

पंहिंजे ॿुधण में माण्हू मशग़ूलु आहे एॾो

ॿिऐ जे ॿुॾण बिना ई ककि थी हलण लॻो आ

हर शख़्स खां संदसि ई पाछो वियो अलॻि थी

हू सूर दिलि जा पंहिंजीअ दिलि सां सलण लॻो आ

हिकु  कूड़ो  इक़रारु शहरु आ

कंहिं वेश्या जो प्यारु शहरु आ

शहरु सॼ(सजो) आ पत्थर पत्थर

त बि मूं जोड़िया शीशे जा घर

राति, सुबुहु ऐं  मंझंदि  छाहे

सिज,चंड,तारनि जी डुक डोड़

साॻियूं घुरिजूं, साॻियो घेरो

घर  वारो   घाणे  जो   ढोर

सचु भलि सीनो साहे , लेकिन

कूड़ अॻुयां लॻन्दो कमज़ोर

शहर मशीनूं , माण्हू , शोर

हिते हले थो  ज़र जो ज़ोर

श्री गोवर्धन भारतीअ जो सिंधी अदब जे उन्हनि लेखकनि में शुमारु थींदो आहे, जिनि खे लफ़्ज़ तरन्नुम सां लिखण जो ॾांउ आहे......

गोवर्धन भारती अञां 25 वर्हियनि जो ई मस हुओ त हुन जा शइरु हिंदुस्तान जे दर्सी किताबनि में शामिल करे सिंधीअ जे शागिरदनि खे पढ़ाया वेंदा हुआ.हिते सन् 1956 ई. में शाया "चूंड सिंधी नज़्म जो इंतिख़ाबु" नाले दर्सी किताब में शामिल बैतनि मां कुझु शइर दोस्तनि जी ख़िदमत में पेश आहिनि 

मतां छिरिकीं मुसीबत खां, मुसीबत ॾाजु तुंहिंजो आ

न कजि पासो कशाले खां, कशालो ताजु तुहिंजो आ

मतां धड़कीं हवाउनि खां, हवा ते राॼु तुंहिंजो आ

न थिजि लुक़्मो ज़माने जो , ज़मानो खाॼु तुंहंजो आ

कंदा सरसी संदइ सोभिया ,क़यामत जा ककर कारा

विखुनि खे हलु वधाईंदो ,अञां ओ क़ाफ़िले वारा

(गोवर्धन भारतीअ जे "ओ क़ाफ़िले वारा" बैत मां)

ـ 

ग़ैब जे पर्दे पुठियां कोई वॼाए साज़ु थो

साज़ मां संगीत जो, मिठिड़ो अचे आलापु थो

रातिड़ी साक़ी बणी , नचंदी अचे थी नाज़ सां

नाज़ सां, अंदाज़ सां,पिणु कंहिं अनोखे राज़ सां

हर शराबी शौक़ मां , नेणनि संदा प्याला झले

राति थी तिनिमें ख़ुमारी जामु ओतींदी हले

तरिसु केॾाह॔ थी वञीं? मूंखे बि पूरो जामु ॾे

आऊ अखिड़ियुनि खे चुमी,ओ दिलरुबा  आरामु ॾे

प्यार सां आग़ोश में ,मूंखे दॿई  छो नथी

सिरु संदमि ओ राति, सीने सां लॻाईं छो  नथी

लोॾि जोभन जे हिंडोले में अची भाकुर भरे

हुस्नु जे आग़ोश में , मदहोश छॾि मूंखे करे

(गोवर्धन भारतीअ जे-राति राणी बैत मां)

श्री गोवर्धन भारतीअ जी हिकिड़ी कविता शाया थी "वाह ड़ी बम्बई!",

- जंहिं अदबी हलक़नि में चङो चौॿोलु मचाए ॾिनो। हिन कविता जे शइरनि जे करे जेको गोड़ु घमसानु मतो, तंहिं हिन ॿहॻुणी शाइर, कलाकार खे घणो निरास कयो ऐं हुन ॼणु त चुप्पी इख़्तियार करे छॾी। इन कंट्रोर्वशियल कविता में वीहारो खनु बंद शामिल हुआ, जिनि मां कुझु ,जेके हरूभरू कंट्रोर्वशियल नेचर जा न आहिनि, हिते दोस्तनि सां वंडिजन था 

- ढोल बि पंहिंजा, ॿोल बि पंहिंजा

  काई रोक न टोक न झल पल

  वाह ड़ी बम्बई

- नानक, शंकर, रामु चपनि ते

  पर गुमनाम उतम ऐं आंचल

  वाह ड़ी बम्बई

- अथनि नशो नाणे , नाले जो

  पद पैसे सां सभई पीतल

  वाह ड़ी बम्बई

- *विस्कीअ ते गिसकी व्यो राणो

  रेस, रमीअ ते रीझे मूमल

  वाह ड़ी बम्बई

-       प्रस्तुति: नंद कुमार सनमुखानी